Something.

وأنا في المطار، كنت عايزة أتوضّى وأصلّي الظهر والعصر، دخلت الحمّام، ووأنا داخلة الحمّام لاحظت إن فيه مُسمار على الأرض، استغربت جدًّا، مش عارفة ليه، حتى استغربت إنّي استغربت، والموضوع أخد حيّز من تفكيري على الفاضي.

طلعت من الحمّام، مشيت شويّة لغاية ما وصلت لمكان الصلاة، كل ده أنا كنت بجُرّ شنطة السفر، بس وأنا داخلة أوضة الصلاة اضطريت أمسك شنطة السفر من الهاندِل بتاعها، مش من البتاع اللي بنجُرّها منه، وأول ما رفعت الشنطة، الهاندِل اتقطع من ناحية.

اتضايقت، علشان دي شنطة أختي، وعلشان أنا بتضايق لمّا أي حاجة تبوظ\تتقطع أكتر من البشر الطبيعيين، وقعدت أحاول أصلّح الهاندِل وماعرفتش، فقلت أصلّي وبعدين أشوف الموضوع ده.

خلّصت صلاة، مسكت الشنطة في حجري ويا أنا يا هي بقى، قعدت أقارن بين الناحية اللي اتقطعت والناحية السليمة، لاقيت إن السليمة فيها مُسمار.

مُسمار!

مُسمار طبق الأصل من اللي شُفته في الحمّام!

يمكن... ؟ 

ممكن مايكونش هو وأكون أنا متهيّأ لي إنه شبهه علشان التوقيت مش أكتر، بس مش هخسر حاجة، نروح نشوف.

رُحت الحمّام، استنّيت شويّة علشان كان فيه واحدة جوّة، وقعدت أدعي إنّي ألاقي المُسمار مكانه، ممكن يكون حد شاله، أو المُسمار نفسه اتدحرج وجري، ممكن حاجات كتير، من ضمنهم إنه مايطلعش مُسمار الشنطة، بس ممكن يطلع مُسمار الشنطة...

overthinking.

الست اللي جوّة مش بتطلع.

حسّيت إنّها قعدت 20 دقيقة، بس مش عارفة، وأكيد مش هثِق في إحساسي بالوقت ساعتها.

المهم، الباب اتفتح، قلبي بدأ يدُقّ جامد، الست بتطلع، ببتسم لها وأنا عايزة أقتلها، ما تتحرّكي أسرع من كده شويّة يا أستاذة، طالعة تتمختري! فيه أرواح شُنَط بتضيع هنا! بدخُل الحمّام، كل ده بيحصل في ثواني، ببُصّ على الأرض، عيني بتيجي في عينه، لسّة في مكانه، ما اتحرّكش ولا فتفوتة! بمسكه، بلفّ الشنطة بعُنف علشان أقارنه بالمكان اللي المفروض يتحطّ فيه، هو! هو ده مُسمار الشنطة!

سُبحان الله.

أنا مش هكون ببالغ إطلاقًا لو قلت إن الموقف ده بمثابة معجزة، خصوصًا بالنسبة لشخص نحس جدًّا زيي. 

حقيقي موقف غريب.

كان ممكن ما أشوفش المُسمار، أو أشوفه وما أخدش بالي\ما أفكّرش فيه، أشوفه من غير ما يدخل الوعي بتاعي، لكنّي شُفته، واستغربته، وفكّرت فيه! انت متخيّل يا مان؟ أرجوك قُل لي إنّك فاهمني وفاهم مدى خطورة الموقف وإنّك مش شايفني مجنونة! أرجوك!

كفاية دراما؟

كفاية دراما.

بس بجد يعني، أحلى مُسمار ده ولّا إيه؟ D: